Dinamiza, Normaliza

Astérix e Obelix na biblioteca

2009-11-13T19:48:00.008+01:00

Xa podedes atopar na sección de novidades da nosa biblioteca, o álbum que conmemora os 50 anos de aventuras con Astérix e Obélix:O ANIVERSARIO.O libro de ouro
Son 56 páxinas inéditas publicadas en outros trece idiomas:francés , alemán ,español, holandés, catalán, vasco, inglés, portugués, italiano, filandés, noruegués,danés e checo.
Se queredes facervos cun exemplar teredes que agardar a reimpresión, xa que a primeira tirada foi tan pequena que nas librerías da contorna xa non se poden conseguir.

Unha homenaxe

2009-11-09T00:46:00.005+01:00

Con este poema de Anisia Miranda lembramos a autora e agradecemos as xoias que nos deixou.
Díxome o paspallás

cando pasou polo río
que non saia o sol
por mor de que vai frío.
Eu mandeille un abrigo
de cunchiñas de mar
para que se acochase
e saíse a pasear.
E o sol saíu tan forte
que o paspallás voou
e entre moitas folliñas
co medo se agochou

ANISIA MIRANDA."Cantarolas".Xerais

Lembrade que podedes atopalo,xunto con outras 31 entradas referidas ao OUTONO en poemasparapeques .

Un proxecto ilusionante

2009-11-08T23:37:00.006+01:00

Así cualificaron moitos dos presentes á Coordinadora Galega de Equipos de Normalización e Dinamización Lingüística,que na mañá do sábado 7 de novembro celebrou a súa 1ª Asemblea e elixiu o seu Consello Directivo.A súa coordinadora xeral será Valentina Formoso Gosende, do IES Félix Muriel de Rianxo.
Recollemos as súas verbas finais no peche da xornada:
.............A CGENDL nace con intención de permanecer no tempo, de xuntar cada día máis apoios de ENDL e tamén de moitos docentes que queren colaborar connosco, nace para SUMAR o noso gran de area a prol da lingua galega, para -desde unha estratexia e discurso propios- acadar os nosos obxectivos. Somos un colectivo plural, moi plural, de xente traballadora, razoable e con moita ilusión, que sempre estará aberto ao diálogo, sempre desde o respecto mutuo que nos caracteriza, e sempre desde a boa intención...

Mais, ímolo dicir ben alto e ben claro, todo o mundo debe saber

que nunca imos renunciar a defender o noso principal sinal de identidade, que en ningún momento imos ter nin medo, nin preguiza de traballar pola súa normalidade, porque temos orgullo do noso, porque temos orgullo do galego que nos imos facer escoitar porque temos algo que dicir sobre o galego no ensino, baseándonos na nosa experiencia e coñecementos.

Cando as cabazas deben rir

2009-11-02T23:09:00.006+01:00

Noutros tempos, cando as noites se facían máis longas ,e o outono facilitaba os materiais,as cabazas convertíanse en obxectos lúdicos .Buscábase a noitiña para asustar a veciños e cativos,colocándoas en lugares pouco iluminados e causar así máis impresión.As fontes,encrucilladas,muíños e palleiras eran os lugares máis comúns para colocalas,e os elexidos eran os máis asustadizos da aldea.
O tallado de cabazas chegou a nós desde culturas antergas nas que adoptaba significados místicos.
Hoxe conservamos unha espléndida tradición culinaria con cabazas,cabazos,calacús,manguetas,pero tampouco andamos mal de creatividade,como podemos observar nas imaxes:

Agradecemos á todas as familias a xenerosa participación e a boa acollida ás nosas propostas.

O samaín

2009-11-01T09:49:00.004+01:00

O xogo do Samaín:

Ben falado

2009-10-02T14:55:00.003+01:00

Palabras no ar

2009-07-27T12:19:00.003+01:00

PALABRA NO AR é o blog da campaña de dinamización lingüística de KALANDRAKA EDITORA, promovida pola Secretaría Xeral de Política Lingüística da Xunta de Galicia.

Nel atiparás emisións radiofónicas, entrevistas, contacontos, enquisas,...

Xoga

2009-07-26T18:46:00.001+01:00

A Secretaría Xeral de Política Lingüística publica este xogo, para nenos e nenas de 3 a 6 anos.

MANIFESTO DA COORDINADORA DE ENDL DE GALICIA

2009-06-13T08:17:00.003+01:00

http://www.coordinadoraendl.org/web/index.php

Canta sabedoría!

2009-05-21T22:23:00.009+01:00

Iván Costa chegou coa súa zanfona e a súa gaita puntual coma un cravo.Os de 5º de Primaria tíñanlle unha entrevista preparada e acrisoláronno a preguntas ,pero a nós serviunos para tirar unha chea de informacións abraiantes.
Empezou de neno a tocar a gaita,e máis tarde adquiriu formación musical,tanto clásica coma no Conservatorio de Música tradicional da Escola de Artes e Oficios de Vigo.Toca máis de 20 instrumentos,todos os da percusión galega. O derradeiro co que se puxo foi coa zanfona,á que lle dedica máis tempo (según el aínda está aprendendo,a nós parécenos que toca de marabilla).
A súa música aparece nuns 15 discos,pero o seu cativo mellor criado é Ávrego,o seu disco en solitario.Disque a actuación que máis recorda é a de Lorient (Francia),cando lle deron o premio Mcallan e tivo que actuar "soíño" diante dun ateigado campo de fútbol.
Díxonos que nos colexios debería haber máis música tradicional galega e lembrounos que en Moaña contábamos co mestre gaiteiro Xavier Blanco, e a Escola de Música .
Podedes consultar a entrevista completa nos vindeiros días en AQUÍ VIVIMOS

Iván Costa:un ex-alumno moi especial

2009-05-19T21:12:00.010+01:00

Un dos apartados do noso proxecto é "AQUÌ VIVIMOS" onde recompilamos informacións e experiencias sobre o noso concello.Trátase de coñecer o que temos preto para valoralo e poder ensinalo ao mundo.
Iván Costa,ex-alumno do noso colexio ,aproveitou cunha sensibilidade notoria as ensinanzas de Xavier Blanco e do gaiteiro Moxenas.
A súa dedicación incansable e o seu talento fixérono participar nunha morea de proxectos: o conservatorio de Música tradicional da Escola de Artes e Oficios de Vigo e a orquestra Son de Seu,traballos editoriais para a didáctica da gaita,recollida de pezas tradicionais por todo o país,espectáculos de música e danza....
Os seus méritos foron recoñecidos con varios premios:Lorient,Constantino Bellón...e o seu prestixio faino formar parte de múltiples xurados de certames musicais.
Ten publicados varios discos ,destacamos ÁVREGO ,o seu primeiro traballo en solitario con temas tanto de produción propia coma recollidas doutros gaiteiros .
O mércores virá cos seus instrumentos e ademais gozar da súa música intentaremos que volva a sentirsea gusto no seu colexio.

Mes das Letras

2009-05-18T23:09:00.007+01:00

Este ano pedímoslle as familias que aportasen lemas ou frases sobre o galego,para animar aos seus fillos .Esta foi a nota que enviamos:

QUERIDAS FAMILIAS:
Chegou o mes de maio,o mes das Letras Galegas.Coma sempre,seguimos animando aos vosos fillos e fillas a valorar e empregar a nosa fala.E esta tarefa non podemos desenvolvela sen vós,sodes o noso apoio fundamental.
Queremos organizar unha exposición.....

O claustro agradece a estupenda colaboración das familias sabendo que xuntos melloraremos a educación dos nenos e nenas de Quintela.

Festival de teatro

2009-05-18T23:00:00.003+01:00

Chegou o día do teatro e a danza.O martes 19 de maio celebraremos o Festival de Teatro.Este ano haberá tamén frautistas,danzantes e cantores.
Teremos unha función para as familias pola tarde,no auditorio do Centro Daniel Castelao .Imos empezar á 16h. e teremos a Xavier Blanco como artista invitado que ademais de tocar unha peza coa gaita,acompañará a muiñeira dos nenos e nenas de 3º.Aí vai o programa:

"Rataferoz" 5º.Teatro
"Media volta" 1º. Danza
"A galiña azul" 3º .Teatro
"Pin Pon" 2º. Canción.
"O polo Pepe". 3 e 4 anos. Canción.
"Ronsel da lingua" 4º. Música.
"Son de muiñeira" 3º. Danza con acompañamento de Xabier Blanco
"Peza de gaita". Xabier Blanco
"Os tres porquiños" 5 anos. Canción.
"Falemos galego" 5º. Pandeiretas
"Na beira do mar" 6º. Frauta.
"A verdadeira historia de Carapuchiña" 6º. Teatro

Centro cultural Daniel Castelao
Martes 19 as 4 da tarde

Microrrelatos no Paralaia

2009-05-14T21:48:00.005+01:00

No mes das Letras,no IES Paralaia (Moaña),o noso centro adscrito, convocaron un concurso de microrelatos.Xa publicaron os nomes dos premiados na súa páxina No bico da lingua así que felicitamos ás gañadoras.Alegrámonos por todas elas sabendo que estes parabéns nos caen preto.Parabéns ás nosas ex-alumnas !
GAÑADORAS DO CONCURSO DOS
MICRORRELATOS LETRAS GALEGAS 2009-05-14

1º Premio: Sofía Portela Diéguez. 2º ESO C

2º Premio: Laura Rocha Bermúdez. 1º ESO C

3º Premio: Eva Trigo Carballo. 1º ESO A

O RAP DA LINGUA DE MIGALLAS

2009-05-10T21:56:00.002+01:00

As compañeiras dos equipos de Normalización e de Biblioteca do Ceip Mestre Martínez Alonso de Vigo achégannos esta fermosa montaxe coa canción do grupo Migallas "O rap da lingua":

O RAP DA LINGUA (MIGALLAS)

QUE FALEMOS EN GALEGO
É UNHA COUSA NATURAL,
COMA A CHUVIA NO INVERNO
E A CALOR NO VERÁN.

EN GALEGO! XA! SI! (BIS)

AINDA HAI PAIS QUE NON LLES FALAN
ÓS SEUS FILLOS EN GALEGO
PORQUE PENSAN QUE É UNHA LINGUA
PARA POBRES E "PALETOS".

AOS TEUS PAIS ANIMARÁS
A FALARCHE EN GALEGO,
QUE NON CHE VAN SAÍR GRANS
NIN TAMPOUCO CAE O PELO.

HAI RAPACES E RAPAZAS
QUE Ó IR Ó INSTITUTO
NON QUEREN FALAR GALEGO
PORQUE DIN QUE É MONTUNO.

MAIS SE ALGUÉN CHE FAI TILÍN
E O QUERES NAMORAR
FAILLE AS BEIRAS EN GALEGO,
DE SEGURO LIGARÁS!

HAI RAPACES E RAPAZAS
QUE QUEREN FALAR GALEGO
PERO AÍNDA NON O FALAN
PORQUE DIN QUE TEÑEN ERROS.

ANQUE O FALES TODO O DÍA
NON CHE PODE SENTAR MAL.
NIN DÁ MOCOS, NIN DÁ FEBRE.
FAI A PROBA E XA VERÁS!

FALEMOS A NOSA LINGUA
QUE É UNHA LINGUA MOI MODERNA,
NAS ESCOLAS E NAS CASAS
NAS CIDADES E ALDEAS.

En galego! Xa! Si!

Letras Galegas 2009

2009-05-10T18:54:00.003+01:00

RAMÓN PIÑEIRO

View more presentations from bibliotecadocole.

o galego nos cativos

2009-05-04T21:35:00.004+01:00

Neste vídeo da entrega dos Premios Mestre Mateo,Belén Regueira expresa moitas das nosas preocupacións.Atopámolo nalinguadetodos .Reparade nel:

SEGUIMOS PRODUCINDO

2009-04-29T08:00:00.002+01:00

Os audiovisuais axúdannos a traballar a oralidade e a capturar intereses cara actividades que se desenvolven no entorno das TICS. Dous novos chegan a nós,un aportado polo grupo de 5ºde primaria como resultado dun traballo sobre os anuncios publicitarios.O segundo ven de Infantil cun recitado dun trabalinguas. Podedes velos tamén en audiobiblio.

RECURSOS SOBRE RAMÓN PIÑEIRO

2009-04-14T22:10:00.000+01:00

Presentamos a páxina web na que reunimos informacións interesantes sobre o autor .
Ramón Piñeiro,o homenaxeado polas Letras Galegas 2009 non é un corredor de carreiras.Podedes coñecer algo sobre a súa vida e obra premendo na foto.Nesta páxina web reunimos diferentes enlaces a materiais que poden servir de axuda clarexar quen era .

VAIA CONTOS !

2009-04-04T17:12:00.000+01:00

Tal como esperábamos ,os nenos e nenas de Infantil e 1º Ciclo, ficaron coa boca aberta.Como comentou unha das súas titoras:"eles con tal de que lles conten contos....."
Gozamos vendo como os contadores se metían no papel que lles tocara,coma se de profesionais se tratara.A expectación por ver a irmáns e coñecidos incrementou a motivación natural que unha sesión de contacontos poida ter.
Moi acertada a selección dos contos e o apoio multimedia,que fixo posible un acercamento diferente a contos tan coñecidos e entrañables coma "O patiño feo","Os tres bandidos" ou "A Cebra Camila".
Aos pequenos gustáronlle todos:a uns a ratiña presumida ,a outros o patiño ,a outros o anano..houbo para todos os gustos.AdemAis recuperamos a unha contadora que había moito tempo que non escoitábamos.PARABÉNS A TODOS E TODAS!....e grazas por compartir os contos con nós.

O CEIP QUINTELA SÚMASE AO MANIFESTO DA COORDINADORA

2009-04-03T15:46:00.000+01:00

De Heroínas de Sálvora do CEIP de Aguiño recollemos este artigo sobre a nova Coordinadora Galega de Equipos de Dinamización e Normalización Lingüística. O noso centro tamén se suma a esta iniciativa dos profesionais da dinamización lingüística que defende a necesidade do cumprimento do Decreto 124/2007 para seguir acadando os obxectivos recollidos nos Proxectos Lingüísticos dos centros:

Na xuntanza mantida por un cento de coordinadores de Equipos de Normalización e Dinamización Lingüística (ENDL) dos centros de ensino públicos e privados no Instituto Galego de Información (Santiago de Compostela) o pasado sábado 28 de marzo, acordouse a constitución dunha Coordinadora Galega de Equipos de Normalización e Dinamización Lingüística para establecer dinámicas de colaboración entre os diferentes equipos, unha cooperación que permita compartir experiencias normalizadoras que redunden positivamente no traballo da dinamización lingüística nos centros de ensino galegos.A primeira acción da Coordinadora Galega de ENDL é dar a coñecer o posicionamento público dos equipos sobre a derrogación do Decreto 124/2007, polo que se regula o uso e a promoción do galego no sistema educativo, anunciada polo novo goberno da Xunta de Galicia.
http://www.coordinadoraendl.org/
"Os Equipos de Normalización e Dinamización Lingüística abaixo asinantes queren manifestar a súa preocupación ante a intención do novo goberno de derrogar o Decreto 124/2007 polo que se regula o uso e promoción do galego no sistema educativo. Como dinamizadores lingüísticos, pero moi especialmente como profesionais do ensino que somos, queremos facer constar o seguinte:1. Este decreto desenvolve o Plan xeral de normalización da lingua galega, aprobado por unanimidade no Parlamento de Galicia no ano 2004 e elaborado, na parte referida á educación, por unha comisión na que se integraban representantes das ANPAS, do profesorado, das organizacións pedagóxicas e das patronais do ensino concertado.2. Supón a superación dunha lexislación, o Decreto 247/95, que -despois de 12 anos de aplicación- tiña demostrado que non estaba respondendo aos obxectivos para os que fora deseñada, tal como poñen de manifesto os últimos datos do Mapa Sociolingüístico de Galicia.3. Persegue como finalidade última que o alumnado acade, ao rematar os seus estudos, unha plena competencia lingüística que o capacite para expresarse oralmente e por escrito nas dúas linguas oficiais de Galicia, no marco dun ensino plurilingüe.4. Favorece que cada centro elabore o seu propio Proxecto lingüístico, documento que debe ser aprobado polo Consello Escolar e que, polo tanto, require a implicación e o consenso de toda a comunidade educativa: profesorado, alumnado, pais/nais, persoal non docente e representantes dos concellos.Dado que consideramos as medidas que se establecen no decreto como unha achega importante na tarefa dinamizadora e normalizadora que realizamos nos centros e que non pasou tempo suficiente para avaliar se os seu resultados satisfán os obxectivos para os que foi aprobado, solicitámoslle ao novo goberno que manteña os compromisos acordados pola comunidade educativa e o Parlamento galego no Plan xeral de normalización da lingua galega"

2 DE ABRIL ,DÍA DO LIBRO INFANTIL

2009-04-02T09:48:00.001+01:00

Hoxe celébrase o Día Internacional do Libro Infantil e nós imos facelo dun xeito moi especial.Teremos uns contacontos aos que agardamos con moita ansia,xa é que os alumnos do IES PARALAIA virán a facer unha animación que todos os anos é deliciosa.
Desde a biblioteca sempre nos gustou contar cos máis vellos do cole para esta actividade,pero desde hai dous cursos forma parte do Proxecto de Dinamización e Normalización dos dous centros.Os beneficios para uns nenos e outros son claros,algún de Infantil non para de decir:"meu irmán,que está no instituto,vai a vir a este cole..."Que nos traerán este ano?

FERMOSA NOITE PARA A LINGUA GALEGA II

2009-03-30T17:42:00.000+01:00

XAVIER P. DOCAMPO deixounos na súa páxina web o seu discurso na noite de entrega dos premios Irmandade do Libro,na que recibiu o premio ao mellor autor.Recollemos unha parte porque non podemos esquecer a satisfacción que nos produciron as súas magníficas palabras

......"

Por iso estou tan a gusto aquí, nesta festa da palabra. Da nosa palabra, da palabra dita na nosa lingua. Das palabras coma bidueiro, ceo, canciño, arrecendo, albaroque, noitébrega, ouriol… que tanto parecen molestar; que tantas ameazas teñen que escoitar; que se lles arrebatan aos nenos e ás nenas coma quen os protexe dunha mala compañía que os pode levar polo mal camiño. Son os que pensan que restarlles coñecemento é mellor que sumárllelo. Eses mesmos fillos aos que se quere eivar, porque, aínda que no futuro poderán ler, coma min, O Quixote, non terán a fortuna que eu tiven e teño de ler Terra Chá, A esmorga ou Merlín e familia. E non será culpa deles, porque ningún ser humano abandona a súa lingua voluntariamente, dun xeito ou doutro sempre o fai obrigado por alguén. As linguas perdidas son linguas arrebatadas e sempre con violencia, quer física quer moral. Violencia da man daqueles que Manuel María acusaba…

[…] de vivir na súa terra desprezándoa,
intentando borrar o seu idioma,
asasinando o seu ser diferenciado.

Ninguén ten dereitos sobre das linguas máis que o pobo que as creou para facérense, como dixo Castelao, “o corpo sensible dunha cultura” ou con Cabanillas, para que sexan “o noso escudo”. Por iso o idioma non é de ninguén, porque é de todos. Non é de onte nin de hoxe, porque é de sempre. A lingua non se protexe nin se preserva para os de hoxe, senón que se garda e continúa para os de sempre, para os que foron, para os que son e para os que han ser. A lingua nin sequera é patrimonio dos que a usan, senón que é un ben da humanidade enteira. Patrimonio para preservar, coidar e estender no seu uso, e para transmitir, para entregar con xenerosidade e con orgullo aos nosos fillos e aos nosos netos e que así se fagan responsábeis da cadea que tamén a eles haberá de trascender. E dentro de mil anos aínda soará saudade, namoro, beizo, aperta, corpo, beixo, orella, tempa, seo, embigo, coxa, pé, deda…

Lembrade aquelas palabras de Castelao: “Como chamaríamos a un home que consentise o derrubamento do Pórtico da Groria? Pois é certamente máis bárbaro quen deixa morrer o idioma, obra de arte insuperable, feita con amor, con door e con ledicia polos nosos antergos, que recibimos en herdo e que temos a obriga de enriquecer co esprito do noso tempo”.

A pregunta de como lle habemos chamar a ese home, que a responda cada un para o seu claetre. A min só me queda pedirvos que non recuedes nin permitades que se recúe. Chámovos á resistencia pacífica, porque non se pode esquecer que os pacíficos somos nós; os belixerantes, por moito que conten dentro con complicidades cipaias, veñen de fóra; dos delirios uniformadores, dos desexos de anular o que de propio e identitario haxa en nós, consideran que a nosa identidade é mala mentres teñen por boa a súa. Por iso a defensa da lingua é a defensa de nós mesmos, sen ela non somos nada no mundo, perdemos as dimensións que nos fan visíbeis, que nos dan o espesor necesario para facermos vulto no mundo.
Victoriano Taibo deixou dito aquilo de…

O galego que non fala
a lingua da súa terra
nin sabe o que de seu
nin é merecente dela.

Así que chamar pola defensa e polo uso da nosa lingua non é máis que facerse dignos da terra que habitamos, facérmonos merecentes dela. Por iso dicimos con gusto aloumiño, cadullo, chorima, cadrifollo, paseniño, besbello, landuxo…

MOITAS GRAZAS XAVIER DOCAMPO! por compartir connosco tanta sabiduría e sensibilidade.

FERMOSA NOITE PARA A LINGUA GALEGA

2009-03-29T20:58:00.000+01:00

Fermosa noite a dos Premios IRMANDADE DO LIBRO no Carballiño.O sábado 28,como se algunha estrela estivera en conxunción co galego,un tras outro fóronse sucedendo os discursos que amosaban especial sensibilidade polo momento que vive a lingua.
Aínda que non levamos o premio polo que nos nomearon finalistas,volvemos cheas de satisfacción porque por unha vez escoitamos de moi diferentes voces aquelo que os noso ollos levan vendo moito tempo.E é o recoñecemento de que o galego pasa por unha situación moi delicada,que non é momento para retrocesos porque queda moito camiño por andar.
Desde o mundo editorial,do libreiro ,da creación literaria e musical o apoio ao galego estivo presente.Compre destacar o discurso do autor gañador deste ano XAVIER P. DOCAMPO pola emotividade,contundencia e fermosura das súas verbas e tamén as cancións que nos regalou UXÍA .

Centros de ensino - IES Blanco Amor de Ourense

Fomento da lectura - Bibliotecas Públicas do Concello de Oleiros

Institucións - Asociación cultural do IES Rosalía de Castro de Santiago de Compostela

Mellor autor - Xavier Puente Docampo

Mellor obra editorial de 2008 - Colección Rescate de Alvarellos Editora

Mellor libro - Festina Lente de Marcos S. Calveiro publicado por Edicións Xerais de Galicia

Librerías - Andel do libro galego e portugués de Vigo.

PARABÉNS A TODOS!

RAMÓN PIÑEIRO E A NORMALIZACIÓN LINGÜÍSTICA

2009-03-20T00:19:00.001+01:00

Cando se aprobou a Lei de Normalización Lingüística ,fai 25 anos;o homenaxeado das Letras Galegas 2009(Ramón Piñeiro) era parlamentario e pronunciou un discurso que o Consello da Cultura Galega acaba de poñer a disposición de todos e todas.
Podedes escoitalo e veredes que practicamente segue de actualidade,ademais compre lembralo para iluminarnos nestes días.Fala do optimista ambiente do Parlamento aquel 15 de xuño,do agradecemento ao pobo galego por ter conservado e transmitido de xeración en xeración o idioma,e da sobresaínte figura de Rosalía de Castro como símbolo de todos os que loitaron a prol da dignificación da lingua galega.