Madamas e galáns en Moaña

A Asociación cultural Meiramar-Axóuxeres ven desenvolvendo un importante labor na recuperación e difusión da cultura tradicional, nomeadamente a relacionada coa música e o baile. Nestes días presentarán unha publicación que recolle a investigación desenvolvida sobre o Entroido de Moaña, os costumes, os personaxes, as danzas e a música, as roupas..

Para coñecer algúns destes datos, estivo con nós o presidente da asociación, Geno Piñeiro que coa súa interesante e didáctica charla trouxo personaxes dos que nada sabíamos. Gustounos coñecer ao Fedelloso e ao Home do saco,  que permanecían na memoria dos nosos maiores e que agora xa coñecemos nós tamén.

O Fedelloso era un personaxe do entroido moañés , saía coas madamas e os galáns pero representaba o papel contrario a estes, xa que en lugar de ser admirado, resultaba molesto polo cheiro que desprendía e as bromas que gastaba aos veciños.

Tamén os acompañaba un home do saco, encargado de manter afastado ao público dos danzantes. Utilizaba a seguinte técnica: levaba un saco cheo de toxos e outras plantas con pinchos e ao arrimarse á xente, facía que estes se retiraran cara atrás para evitar picarse.

Estas foron algunas das informacións que nos truxo Geno Piñeiro.