O venres, os nenos e nenas de 5º tivemos unha xornada de remo da man de kevin, adestrador e remeiro no Clube de Remo Tirán. Contounos moitas cousas sobre este deporte e tamén ensinounos as instalacións coas que conta o clube. Ao final da xornada, tivemos a sorte de saír ao mar subidos nos bateis.
Como nos gustou!!!
Grazas Kevin por ensinarnos tantas cousas e grazas ao clube pola súa invitación.
Os nenos e nenas de 5º e 6º fixeron unha saída ao monte do Facho (Cabo Home). Aprenderon sobre a historia das excavacións e tamén admiraron as fermosas vistas que lles permitiu o lugar.
Logo, merendaron e xogaron un pouco na praia de Liméns e de Santa Marta.
Estivo xenial!
Cada dous anos, cando chega o verán, Moaña celebra o Encontro de Embarcacións Tradicionais.
Hoxe estiveron no cole Cándido Miranda e Pablo Martínez, representando a asociación de Sueste para traernos información sobre as embarcacións tradicionais.
Cándido falounos sobre a evolución dos barcos na historia. Primeiro empregábanse simples troncos, pois flotaban e servían para chegar dun lado ao outro coa axuda dun pau. Despois xa eran estruturas de madeira, con vela ou con remos.
As primeiras embarcacións foron canoas excavando os troncos, pero despois empezáronse a construir embarcacións máis sofisticadas, con varios velames e maior envergadura. Despois empregouse ferro, ata os barcos de fibra de vidro de agora.
Tamén nos contou que as primeiras viaxes empezaron nas illas da Polinesia e que os vikingos foron grandes navegantes.
Pablo falounos sobre ás embarcacións tradicionais de Galicia, contounos que había moitos tipos e que estaban traballando para recuperalas, rescatándoas e restaurándoas.
Nomeu os pataches, os galeóns, as traiñeiras, o racú, as dornas, a buceta, a lancha de relinga , a chalana e os botes. De cada un deles sabía cousas curiosas. Agora xa sabemos que as primeiras competicións entre traiñas buscaban chegar antes para vender o peixe.
Falounos do Eliseo, un galeón que se salvou da queima do asteleiro Casqueiro.
A sexto encantoulles esta experiencia.
Aquí tedes as actuacións do alumnado de infantil e primaria
4º INFANTIL: CANCIÓN "A PRIMAVERA"
1º PRIMARIA: CANCIÓN "CANTO SEI"
3º PRIMARIA: CANCIÓN "PARAMPAMPERO"
5º PRIMARIA: CANCIÓN "VAI TU, VAI TU, VAI ELA"
O alumnado de 5º de primaria estivo investigando sobre o Entroido Tradicional de Meira, a partir dunha charla que lles deu Manuel Cobas, membro da Asociación Meiramar Axóuxeres no cole.
Fixeron un tríptico coa información obtida e tamén gravamos as voces contando todo o que aprenderon. Aquí vos deixamos o video e o tríptico elaborado coa información aportada por Manuel:
No seguinte enlace a Real Academia Galega ofrécenos variados recursos sobre Xela Arias: unha serie documental, micropezas audiovisuais e tamén relatos lúdicos e didácticos para o alumnado de infantil e primaria.
Agardamos que vos gusten!
No seguinte enlace O Portal da Lingua Galega ofrécenos as exposicións e as guías didácticas das dúas mostras gañadoras do Concurso-exposición das Letras Galegas deste curso.
Tamén atoparedes actividades sobre Xela Arias que se están a realizar nos centros educativos.
https://www.lingua.gal/o-galego/promovelo/dia-das-letras-galegas
O xoves, 30 de abril, tivemos a visita de Fran Ogando.
É membro da Asociación de Apicultores do Morrazo e contounos unha chea de cousas moi interesantes sobre as abellas.
Tamén nos falou da vespa velutina e amosounos como facer unha trampa caseira para atrapalas.
Resultou unha charla moi interesante e agradecémoslle moito a Fran que nos dedicara o seu tempo para amosarnos tantas cousas sobre a apicultura.
O Seminario Galán ofrécenos un ano máis unha ampla recompilación de recursos e actividades sobre Xela Arias, homenaxeada este ano nas Letras Galegas.
Premede na imaxe
Se premedes na imaxe atoparedes unha chea de recursos que pon á nosa disposición a Real Academia Galega sobre a vida e obra de Xela Arias: descargables, fichas interactivas....
Animádevos a coñecela un pouquiño máis!
Onte recibimos a visita de Lorena, a nai de Mara.
Estivo contándonos o conto titulado "Así es mi corazón".
Un conto cheo de corazóns e sentimentos.
E ti, de que cor tes hoxe o teu corazón?
Moitas grazas, Lorena pola túa visita e o teu conto!
O 15 de abril recibimos unha charla sobre o impacto dos plásticos na nosa ría.
Esta campaña organizada polo Concello de Moaña pretende informar e concienciar á rapazada sobre o impacto dos plásticos e microplásticos nos ecosistemas mariños.
Os datos son moi preocupantes e quedounos moi claro que todos e todas temos que colaborar para reducir o consumo de cousas feitas con plásticos.
A pasada semana o alumnado de 5º contamos coa visita de Karla Carracelas que nos achegou ao mundo da fotografía.
Esta actividade audiovisual, organizada dentro do programa Aprende Moaña, titulábase "Pintar con Luz" e coñecemos algúns aspectos como as regras básicas da fotografía, construimos o noso propio proxector de imaxes e achegámonos á técnica do revelado.
A actividade resultou interesantísima!!
Se queredes coñecer a Xela Arias, escritora homenaxeada este ano nas Letras Galegas, premede nestes enlaces e descubriredes unha chea de recursos:
Aquí vos deixamos unha pequena mostra da saída que fixo a clase de 1º á praia do Con.
Foi unha xornada fantástica na que gozaron do xogo ao aire libre.
Á volta visitaron a clínica veterinaria onde curaron ao gatiño que atopamos no colexio.
Pasárono fenomenal!
A comezos de marzo as nenas e nenos de 5º e 6º tivemos a sorte de contar coa visita de Edita de Lorenzo. É enxeñeira de Telecomunicacións, profesora da Universidade de Vigo e foi a primeira muller en Galicia ao fronte dunha escola de enxeñaría.
Contounos unha chea de cousas sobre o seu interesante e importante traballo na Universidade de Vigo. Destaca o seu traballo de investigación sobre aplicacións Tic para detectar o cancro de mama.
Tamén nos dixo que mulleres e homes están igualmente capacitadas e capacitados e poden ser profesionais de éxito no mundo da enxeñaría.
Agradecémoslle a Edita que compartira con nós a súa sabedoría e o seu valioso tempo.
